Niðurstøður hjá Kommunala eftirlitinum

Endamálið við at almannakunngera niðurstøður hjá Kommunala eftirlitinum í hesum savni er at upplýsa um rættarstøður á kommunala økinum, soleiðis at kommunurnar fáa betri fyritreytir at virka í samsvari við kommunala lóggávu og kommunufulltrúina.

Kommunalur stuðul til eina átrúnaðarliga samkomu

Málið í stuttum
Eftirlitismálið snýr seg um, hvørt Tórshavnar kommuna hevur latið ólógligan fíggjarligan stuðul til eina átrúnaðarliga samkomu.

Niðurstøða
Kommunala eftirlitið metir, at Tórshavnar kommuna letur samkomuni ólógligan fíggjarligan stuðul, um kommunan ikki tryggjar sær og kunnar um, at ítøkiligu parkeringsbásarnar fram við Vegnum Langa í Hoyvík kunnu nýtast av øllum borgarum í kommununi, á jøvnum føti við samkomuna.

Avgerð nr. 23/17415-8.

Les alt um málið her.

Klaga um rættin hjá borgarstjóranum at taka avgerð í máli uttan um kommunustýrið

Málið í stuttum
Eftirlitismálið snýr seg um, hvørt borgarstjórin í Sørvágs kommunu helt galdandi reglur, tá ið borgarstjórin avgjørdi at taka eitt mál aftur úr rættinum, uttan samtykt frá kommunustýrinum.

Niðurstøða
Kommunala eftirlitið metir, at borgarstórin í Sørvágs kommunu ikki helt § 21, stk. 3, tá ið borgarstjórin vegna kommunustýrið tók avgerð um at taka stevningina, sum kommunustýrið hevði samtykt, aftur.

Avgerð nr. 24/02903-10 (Mál viðgjørt av Umhvørvismálaráðnum vegna ógegni hjá Løgmálaráðnum).

Les málið her.

Umsókn um frávik frá eitt árs freistini í § 7 í kunngerð um alment útboð av kommunalari fastogn

Málið í stuttum
Sjóvar kommuna søkti Kommunala eftirlitið um frávik frá § 7 í kunngerð nr. 122 frá 22. desember 2000 um alment útboð av kommunalari fastogn. Orsøkin var, at meira enn eitt ár var liðið, síðani kommunan seinast hevði lýst ítøkiligu fastognina til sølu.

Niðurstøða
Kommunala eftirlitið sýtti umsóknini við tí grundgeving, at eitt árs freistin í § 7 í kunngerð um alment útboð av kommunalari fastogn er endalig. Hetta er eisini galdandi í teimum førum, har kommunan er farin undir samráðingar um sølu við áhugaðan keypara, áðrenn eitt árs freistin er farin. Avgerandi er, um bindandi avtala um sølu av ognini er gjørd, áðrenn eitt árs freistin er farin.

Avgerð nr. 24/14711-2

Les skrivið her.

Søla hjá Sunda kommunu av neystagrundum til eigarar av ástandandi neystum

Málið í stuttum
Eftirlitismálið snýr seg um, hvørt Sunda kommuna helt galdandi reglur, tá ið kommunan seldi kommunalar fastognir, uttan at ognirnar frammanundan vóru lýstar alment til sølu.

Niðurstøða
Kommunala eftirlitið metir, at Sunda kommuna ikki helt reglurnar um alment útboð av kommunalari fastogn, sum ásett er í § 1 í kunngerð um alment útboð av kommunalari fastogn, sbr. § 44, stk. 1 í kommunustýrislógini, tá ið Sunda kommuna seldi omanfyri nevndu neystagrundir hjá kommununi uttan at bjóða ognirnar út alment. Kommunala eftirlitið vísir eisini á, at tað ikki var í lagi, at Sunda kommuna seldi nakrar av neystagrundunum, meðan Kommunala eftirlitið kannaði, um kommunan hevði heimild at selja ítøkiligu fastognirnar.

Avgerð nr. 23/04014-10

Les alt málið her.